Content

Fram mætir Fylki á Fylkisvelli kl. 19:15 í kvöld.  Búast má við hörkuleik eins og venjulega milli þessara liða! Sæti í 8-liða úrslitum Bikarsins er í húfi.

Fram í Árbænum

Fram hefur einu sinni áður leikið á Árbæjarvelli í Bikarkeppninni. Árið 1986 lék Fram við Fylki í 16 liða og Gummi Torfa gerði eina markið í 1-0 sigri.

Leikurinn fór fram á möl í Árbænum og Fylkir lék þetta ár í 2. Deild en Fram varð Íslandsmeistari.  Í íslenskri knattspyrnu 1986 er sagt að "Framarar lentu í basli gegn Fylki á Mölinni í Árbænum"  - Þorsteinn Þorsteinsson bjargaði á línu í lokin frá Fylkismönnum.  Þetta er eini bikarleikur liðanna á Árbæjarvelli.  Fylkismenn léku þarna í 2. Deild en það var stutt í að þeir sæust í Efstu Deild.  Mark Guðmundar Torfasonar var hans 14. fyrir Fram í bikarnum og hans næst síðasta - Guðmundur skoraði gegn KR í næstu umferð í 6-2 sigri en hann gekk til liðs við Beveren í Belgíu um haustið.  Það voru Pétur Ormslev og Guðmundur Steinsson sem gerðu flest mörk Fram í Bikarnum þetta sumar, Pétur 4 mörk og Guðmundur S. 3 mörk.

Auk bikarsigursins 1986 hefur Fram aðeins unnið tvisvar á Árbæjarvelli, 3-0 1989 og aftur 3-0 2008. Fram hefur fjórum sinnum gert jafntefli gegn Fylki í Árbæ í 12 viðureignum alls en tapað sex sinnum.

Annars eru bikarleikir Fram og Fylkis skv. ksi.is þessir:

31.7.1974 00:00 Bikarkeppni karla Laugardalsvöllur Fram Fylkir 4-0
5.8.1981 00:00 Bikarkeppni karla Laugardalsvöllur Fram Fylkir 1-0
9.7.1986 00:00 Mjólkurbikar karla Fylkisvöllur Fylkir Fram 0-1
28.9.2002 14:00 Coca-Cola bikar karla Laugardalsvöllur Fram Fylkir 1-3
30.7.2009 19:15 VISA-bikar karla Laugardalsvöllur Fram Fylkir 2-0

Fram tapaði í úrslitunum fyrir Fylki 2002, þegar Andri Fannar Ottóson gerði mark Fram.  Í fyrra vann Fram Fylki 2-0 í Bikarnum, aðeins nokkrum dögum eftir 2-1 tap í Deildinni í Árbænum.  Sam Tillen og Jón Guðni Fjóluson gerðu mörk Fram á síðustu fimm mín leiksins.  Þetta er eina tap Fram fyrir Fylki í Bikarkeppninni.  Fram hefur tapað í úrslitaleik eftir þrjá síðustu sigra sína gegn Fylki í Bikarnum, 1981, 1986 og 2009 - fjórum sinnum ef 2002 leikurinn er talinn með.

Fram og Fylkir 2010

Fram hefur þegar leikið einu sinni gegn Fylki í Árbænum 2010, þegar liðin gerðu 2-2 jafntefli í 4. umferð.  Síðan þá hafa Fylkismenn hlotið 1 stig í Pepsi-Deildinni en Framarar hafa bætt við 8 stigum.

Fram vann ÍR 2-1 í 32 liða úrslitum og gerði Ívar Björnsson bæði mörkin fyrir Fram.  Á meðan fór Fylkir í Garðinn og vann Víði 2-0 með mörkum frá Jóhanni Þórhallssyni og Tómasi Þorsteinssyni.